Month: April 2016

مخمَلی دھاگوں میں پیوَست سانسیں

سانسوں سے بندھی اُلجھتی آہیں

آہوں میں چُھپے مدہوش شرارے

شراروں سے آراستہ ریشمی جھنکاریں

جھنکاروں میں بَجتے مَرمریں اِشارے

اِشاروں میں جھَلکتے شوخ سِتارے

ستاروں میں چمکتی افشانی سِلوٹیں

سِلوٹوں سے لِپٹتے مُلائم افسانے

افسانوں میں تڑپتے نرم نظارے

نظاروں سے بیاں ہوتے جواں سہارے

کورے نینوں میں جب جھانکوُں ٹُوٹے تار ہی دیکھوں

کبھی جُنبشِ سوز کہیں بےسُر و ساز دیکھُوں

فراموش شام کے بِسرے سایوں میں خُود کو کھوجُوں

بے رَبط قافلو ں میں چُھپے دِلکش مناظر دیکھوُں

بیابانِ دشت کے بُجھتے دِیوں  سے ذات جلاؤں

سرگرم کوششِ رسائی کی آڑ میں مات دیکھوُں

بازئِ زندگی کے فریبی رُخسار پہ مُہرے بِچھاؤں

مُقابلۂِ شطرنج کے انجام میں خوُدی کو لُٹتا دیکھوں

رنگوں کو فقط ذیب دیتا ہے بِکھرنا ، گرچہ میں بِکھروُں تو کیا ہو

پِھر سوچتی ہوُں آتش اَفروز کس رنگ میں نِہلاۓ گا مُجھے

پِگھل رہے ہیں بادل شمس کی تپِش سے جو بے تاب ہیں برسنے کو

اگر یہ گُستاخی تُجھ سے ہو تو میں خُدا سے بھی لَڑ جاؤں

اُس کا عکس نظر آنے لگا ہے مُجھے اِن سُنہری رنگوں میں اب تو

یہ آئینۂِ تصوّر ہےساقی کا جس کی کشِش میں جذب ہوئی جاتی ہوں

کائینات کے رنگ ہیں جامنی گُلابی اور کبھی سُرمئی بھی

رمز شناس ہو رنگِ عشق کو پِہچانو اِ نہیں سنوارو،  اور ضبط نہ کرو

بے مِثال تُو نہیں تیری شِدّت ہے جس کی ذیست سے شمعٰ روشن ہے

جانِثار کرتی ہوں پروانے پر جس کی عِبادت میں آیت نہیں اُس کا نام یاد ہے

 

دِل چاہے کہ روز

نئی کونپلوں کو

خُود میں بَنتے دیکھوں

پھر اِن کے جوبن سے

آراستہ ہوں حُسن

اور کِھلے گُلشن جب

اِس بدن کی سُرخ

شام میں جگیں سُرمئی

خواب جن میں

….سرُور کے سِوا کُچھ نہ ہو

دل چاہے کہ اُس ذُلف

کی سیاہ رات سے

اِس رُخ پہ اندھیرے

جگمگائیں اور وہ چُنے

تب اِن ہیِروں کی چمک

سے چَند نرمگیں پل

جن میں بِہہ کے ساحِل

کو بھُول جائیں اور پائیں

ایسی منزلیں جن میں

….روشنی کے سِوا کُچھ نہ ہو

دل چاہے کہ سرد شُعلہ

ہلکے ہلکے بُجھے اور

اِس ٹھنڈک سے پیر جلیں

تب بِچھنے لگُوں اُن قدموں

کی خوبصورت آغوش میں

اورنس نس میں دوڑتی

آگ اِس تاثیر کو ایسے

سُلگاۓ جِس میں

….بے خُودی کے سِوا کُچھ نہ ہو

رُوح کِھچتی چلی گئی اُن لبوں میں ریزہ ریزہ ہو کر

اِس شباب و اُلفت کے کھیل میں عکس چُھپ سا گیا ہے

عالمِ اِنتہا میں ٹُوٹے شِدّتِ وصل تڑپ کے باہوں میں

اِس کسک و جلن کے کھیل میں وجُود بِہک سا گیا ہے

کِتنی بے چین تھی اُن ہاتھوں کی نرماہٹ میں یہ کلیاں

اِس وجد و تِشنگی کے کھیل میں ساغر چھَلک سا گیا ہے

شمعٰ کی کروٹوں میں آندھیوں کے شور کی ہلچل تھی

اِس موم و شبنم کے کھیل میں جسم پِگھل سا گیا ہے

چَندن کے لَمس میں بُھلا دیا

خوُد آشنائی کو ہم نے اِس طرح

جیسے احساس کے جھرونکوں کو

…..سِہلا رہی ہو یہ خُوشبوُ

لِپٹی رہی مَلبُوس کی چار دیواری

میں رات بھر اِس طرح جیسے

ریشمی خیالوں کو

….مِہکا رہی ہو یہ خُوشبُو

زُلف میں جَڑ گئی ہے

موتِیۓ کی کلی بن کر اِس طرح

جیسے سِلوٹوں کی فِضاؤں کو

….بِہلا رہی ہو یہ خُوشبُو

پیمانۂِ لَب چُور ہے

بھرپُور نشے میں اِس طرح

جیسے مخمُور انگڑائیوں کو

….جگا رہی ہو یہ خُوشبُو

گِرفت میں ہے مۓِ آتِش کہ چھَلک نہ جاۓ کہِیں

پِیتے پیتے ایک مُدّت  ہی نہ گُزر جاۓ  کہِیں

بھرے پیمانوں میں تیرتی ہیں پنکھڑیاں کنول کی

ڈُوبتے ڈُوبتے ایک مُدّت ہی نہ گُزر جاۓ کہِیں

غُنچۂِ دل ہے شگُفتگی کے طلِسمات سے مَخموُر

مُسکراتے مُسکرات ایک مُدّت ہی نہ گُزر جاۓ کہِیں

صندل بنے اُس وجُود کی رحمت سے پیراہنِ جاناں

مِہکتے مِہکتے ایک مُدّت ہی نہ گُزر جاۓ کہِیں

آغوشِ صنم میں بِکھر رہے ہیں کِنارۂِ جسم و جاں

سِمٹتے سِمٹتے ایک مُدّت ہی نہ گُزر جاۓ کہِیں

 

اِن خوابوں کے جھمیلوں میں

جب سَچ کی دُھول اُترتی ہے

اور تلخ کڑوی پیاس کوئی جب

گھُونٹ بن کر اَٹکتی ہے تب

حقیقت کے سفید ورقوں پہ

سیاہی کا رنگ جب چڑھتا ہے

پھر چند جھُوٹے کِردار اور نقلی

افسانے پروان چڑھتے ہیں

اور اِن بے جان رُوحوں میں

جَگتی ہیں بناوٹی جِسموں کی

راکھ اور پِھر ہاتھوں کی لکیریں

…..مدھم نظر آنے لگتی ہیں

سُہانے پَلوں سے لِپٹے شاخ

کے جھُولتے سبز پتّے اور

اُن کے رس کو پیتے ہُوۓ

زرّہ زرّہ جب بھرنے لگے

نسوں میں زہر کا نشہ

تب دُور کہیں ایک فاختہ

اپنے پَر کٹنے کا جشن منا رہی ہوتی

ہے جِس کی اُڑان اِک حسرت

میں قید اُس آندھی کی شِدّت

اُڑا لے جاتی ہےاور تب

اُس کے آدھے مظبُوط اور

پُورے اِرادے جب ٹُوٹتے نظر

آئیں تب اُسے اپنی تقدیر

…..مدھم نظر آنے لگتی ہے

وہ لِکھے کورے کاغذ پہ مُجھے اور غرق ہونے لگوں

یہ سَچ ہے میں اُس کی غزل جیسی دِکھتی ہوں

خُود کو پایا ہے اُس کی شناخت میں بے حساب

یہ سَچ ہے میں اُس کی کہانی جیسی دِکھتی ہوں

اُس کی نظر سے دیکھوں بے تحاشہ حُسنِ رنگینیاں

یہ سَچ ہے میں اُس کے موسموں جیسی دِکھتی ہوں

اُس کی گُفتگو سے عیاں ہے میری داستانِ آشنائی

یہ سَچ ہے میں اُس کی نظم جیسی دِکھتی ہوں

اُس کے قدموں کے نِشاں میں میری تقدیر پِنہاں ہے

یہ سَچ ہے میں اُس کے ساۓ جیسی دِکھتی ہوں

اُس کے عکس میں تشبیہِ شمعٰ چمکتی ہے ہر سُو

یہ سَچ ہے میں اُس کے آئینے جیسی دِکھتی ہوں

یہ رات کیوں ہوتی ہے؟        یہ شام کیوں ڈھلتی ہے؟

یہ دن کیوں نِکلتا ہے؟           یہ فِضا کیوں چلتی ہے؟

یہ رنگِ عشقِ کائنات ہیں ، اِن میں کھو جائیں

یہ پرِندے کیوں چِہچہاتے ہیں؟      یہ بادل کیوں گڑگڑاتے ہیں ؟

یہ آندھیاں کیوں مچلتی ہیں؟     یہ بِجلیاں کیوں چمکتی ہیں؟

یہ حُسنِ عشقِ کائنات ہیں ، اِن میں سِمٹ جائیں

یہ نظر کیوں بِہکتی ہے؟        یہ سانس کیوں اُکھڑتی ہے؟

یہ دل کیوں دھڑکتے ہیں؟         یہ جذبات کیوں تڑپتے ہیں؟

یہ صباحتِ عشقِ کائنات ہیں ، اِن میں نِکھر جائیں

یہ پُھول کیوں کِھلتے ہیں؟        یہ رنگ کیوں بِکھرتے ہیں؟

یہ آگ کیوں جلتی ہے؟            یہ پیاس کیوں بڑھتی ہے؟

یہ مُعجزۂِ عشقِ کائنات ہیں،  اِن میں سنور جائیں

یہ چاند کیوں چمکتا ہے؟        یہ سمندر کیوں ڈُوبتا ہے؟

یہ جھرنے کیوں بِہتے ہیں؟         یہ شَمس کیوں نِکلتا ہے؟

یہ فِردوسِ عشقِ کائنات ہیں ، اِن میں اُتر جائیں

یہ جسم کیوں پگھلتا ہے؟           یہ ساز کیوں بَجتا ہے؟

یہ رُوح کیوں کھِچتی ہے؟           یہ خواب کیوں بُنتی ہے؟

یہ معرفتِ عشقِ کائنات ہیں،  اِن میں مِٹ جائیں

یہ اُنس کیوں ہو جاتا ہے؟         یہ آنکھ کیوں ٹکراتی ہے؟

یہ زُلف کیوں لِہراتی ہے؟          یہ آہٹ کیوں چونکاتی ہے؟

یہ دولتِ عشقِ کائنات ہیں ، اِن میں چُھپ جائیں