Month: August 2016

گُلشن گُلشن رُوح کھِلتی گئی

تُمہیں دیکھا شام مہکاتے ہُوۓ

جھرنوں کی لےمیں بِہنے لگی

تُمہیں دیکھا پیار برساتے ہُوۓ

پہاڑ سُناتے رہےمست کہانیاں

تُمہیں دیکھا گِیت گُنگناتے ہُوۓ

ستارےسےکہکشاں بنتی گئی

تُمہیں دیکھاعرش پہ مُسکراتے ہُوۓ

سمندر میں ڈُوب رہی تھی پری

تُمہیں دیکھا لہروں میں آتے ہُوۓ

رنگین تِتلیوں کو اُڑاتاگیاآنچل

تُمہیں دیکھاہوامیں بَل کھاتے ہُوۓ

آبشارسے سُنی نشیلی رُباعیاں

تُمہیں دیکھا جام پِلاتے ہُوۓ

شمس کی پلکوں میں اُتری چاندنی

تُمہیں دیکھا خوُد میں سماتے ہُوۓ

جھیل سرہانےکنول میں سوئی

تُمہیں دیکھا عکس چُراتے ہُوۓ

وادیوں میں دھڑکنوں کا شور سُنا

تُمہیں دیکھا باہیں پھیلاتے ہُوۓ

بادلوں کی آغوش میں چلتی گئی

تُمہیں دیکھا نظر اُٹھاتے ہُوۓ

ہر موڑ پہ اُن ہاتھوں

کی نرمی میرے سفر

کو دلکش بناتی رہی

اور اپنی باہیں میں اُس

…سِمت پھیلاتی رہی

ہر موڑ پہ وہ مُسکراہٹ

ایک چمکتے سمندر کی

طرح مُجھے مِلی جدھر بھی

…یہ دل گیا

ہر موڑ پہ اُس نگاہ

نے خُوشگوار کیۓ میرے

راستے جب جب بادلوں پہ

…پاؤں میرے پڑے

ہر موڑ پہ وہ باہیں مُجھے

بُلاتی رہیں جن کےدائروں

میں چُھپ کے تصویر

…میری بنتی گئی

ہر موڑ پہ اُس آواز

نے کئی بار نام میرا لیا

اور میں کھچتی گئی اُن

…صداؤں کی جانب

ہر موڑ پہ اُن قدموں

کی آہٹ نے روکنا چاہا

مُجھےاور میں چُنتی گئی

…وہ پُر کشش نِشاں

ہر موڑ پہ اُس شخص

کی خوشبو نے پِیچھا کیا

میرا اور میں اِس تلاش میں

…جذب ہوتی گئی

 

سَرسَرسرکتی ہوائیں جہاں مدہوش ہوکرجھُومنےلگیں

جذبات کے پردوں پہ جہاں مخملی جال بِچھتے ہوں

دلکش انداز میں جہاں سجتے ہوں گُل و شجر بھی

….وہ شہر میرے جانم کے نام سے پہچانا جاتا ہے

جہاں سحر و شب چاندنی سجدے کرتی ہو

جہاں ہر پل بارش ٹُوٹ کے برستی ہو

جہاں دھنک کے آسمان میں حُسن کھیلے

….وہ شہر میرے دلبر کی دھڑکنوں سےمنسُوب کیاجاتا ہے

جس کی مِہک میں کِھلنے لگیں جسم و جان

جس کی ذُلف کو چُومیں تو ریشم بَنیں

جس کی سانسوں میں سمندر سی بے چینی ہو

….وہ شہر میرے محبُوب کی خوشبو سے یاد کیاجاتا ہے

جہاں دل عبادت میں صرف اُس کا نام لے

جہاں اُس چہرے کے سامنےسورج بھی ماندھ پڑے

جہاں سوآسمان بھی کم ہوں اُن بانہوں میں گُم ہو نےکو

….وہ شہر میرے گُلفام کے وجود سے جانا جاتا ہے

میں ایک خیال ہُوں جس کی

…حیِثیّت سیِپ میں بند موتی سی ہے

کوئی سراب ہُوں جس میں

…گُم ہو جانے کا ڈر ہو

ایک مُرجھایا گُلاب ہُوں جس کے

…رنگ میں شوخی کمال کی ہے

یا صرف ڈھلتی شام جس کے

…آسمان پہ شمس کا گُزر نہ ہو

شاید تَپتی ریت ہُوں جس میں

…جلنے سے راحت بخشتی ہےپیروں کو

وہ چاندنی ہُوں جس کے

… داغ میں جھیل آئینہ دیکھتی ہے

کبھی نرم احساس کا بِچھونا جس کے

…آنچل میں کانٹوں کے گُلدستے ہیں

یا صرف ڈُوبتا سمندر جس میں

…فنا ہونے کا خوف بھی نہیں

میں وہ پرچھائی کو اوڑھے ہُوں جو

…اپنی شناخت ڈھُونڈ رہی ہے

کوئی سایہ ہُوں جو فقط

…چھاؤں میں نظر آۓ

ایک خواب کی ذینت ہُوں جس کی

…شان میں حقیقت سجدے کرتی ہے

کسی مہربان کا عکس جس کا

…آئینہ ریزہ ریزہ  ہو گیا ہے

کوئی بِسری داستان ہُوں جس کو

…یاد کرنا دُشوار ہے

یا پھر سِسکتی شمعٰ جس کے

…جنون کو ایک جھونکے کا اِنتظار ہے

تُم کہتے ہو جاناں جی بھر کے نہ دیکھیں ہم تُمہیں

اِجازت دو کہ تُمہیں جُھکتی پلکوں میں چُھپاسکیں ہم

تُم کہتے ہو پیامِ مُحبّت نہ عیاں ہو چہرے سے کِہیں

اِجازت دو کہ حالِ دل آنسوؤں میں ادا کر سکیں ہم

تُمہیں ڈر ہے ٹکرا نہ جائیں کہِیں چلتے چلتے دو دل

اِجازت دو کہ یہ پل احساسِ خوشبو سےبھر سکیں ہم

تُمہیں ڈر ہےدھڑکنِ دل کا شورنہ سُن لیں غافِل کہِیں

اِجازت دو کہ سوزِ ساز میں چُور حال سُنا سکیں ہم

تُم کہو تو کترا کر گُزر جائیں اِس مقامِ وصل سے

اِجازت دو کہ عشقِ رُوحِ میّت کو دفنا سکیں ہم

تُم کہو تو آشیانِ چلمن میں شمعٰ اپناوجود مِٹا دے

اِجازت دوکہ تُمہارےنام کو موم پہ تراش سکیں ہم

دیکھ رہے ہو تُم ہر لمحہ مُجھے محفل ہو یا تنہائی

جُدا ہوُۓ ہم ٹھہری رہی نظر آنکھوں میں جذب ہو کر

عالمِ وصل پہ نہ کوئی اِختیار نہ جور و جفاکی بندش

بدن جُدا ہُوۓ رُوح گُھل گئی سانسوں میں جذب ہو کر

نگاہِ شوق کی عِنایت سے ہُوۓ میرےجان و تن فروزاں

اندھیراسوۓ چاندنی اُترنےلگی دھڑکنوں میں جذب ہوکر

خائِف ہوتا ہے دل ہِجر کی آزمائش سے جب بھی گُزرے

لمحہ غرُوب ہُوا جاگ اُٹھی قُربت کرنوں میں جذب ہو کر

احساسِ دُوری کی کسک نے دلاۓ ہیں یاد نشِیلے پَل

لَب خُشک ہُوۓ اور بھیگتے گۓ آہوں میں جذب ہو کر

ہاۓ وہ خوُشبو میں لِپٹے ہاتھ

میری ہستی کو فنا کر چلے

وہ پناہوں کے مظبُوط جھرونکے

پِھر سے ارماں جگا کر چلے

چمکتی زنجیروں کے قید خانے

دل کے پنجرے کو اُڑا کر چلے

اُف وہ آئینے سےشفاف ساۓ

پِھر سے میری رُوح چُرا کرچلے

اَن کہےالفاظ کہہ گۓ اِشاروں میں

وہ اِک نئی پیاس کو بڑھاکرچلے

رُوٹھےجذبات کی راکھ اُڑتی گئی

شمعٰ کی موم کو پِگھلا کر چلے

خواب آنکھوں میں بند

ایک تصویر کی مانِند

ہیں جن کے رنگ اپنی

شناخت میں بے مثال ہیں

اور اِن کی شوخی سے

جب میری نیند کروٹ لینے

لگتی ہے تب کُھلتے ہیں

نۓ دریچے جن سے

…نظر آتی ہیں جَنّتیں

خود کو سونپتے ہُوۓ

اِن جَنّتوں میں جب

سبز ہواؤں کے شور

تلے لہرانے لگُوں تب

وہ حسین وجُود باہیں

پھیلاۓ اِس ریشمی آنچل کا

….اِنتظار کر رہا ہوتا ہے

رات کے اِس ادھُورے

پِہر جب چمپئ پھُولوں

میں لِپٹے دو بدن خوابوں

میں بسے سراب کو چھُو

رہے ہوتے ہیں تب ایک

ہلکی سی آہٹ چونکا دیتی

ہے اور آنکھ سے پَلک کا

رِشتہ فاصلوں میں بدل جاتا

ہے اور وہ پُرکشش چہرہ

اُسی کُہرے میں واپس

…لَوٹ جاتا ہے

پھر ایک دن نہ خواب آیا

اور نہ ہی پلکوں نے فُرقت کا مزا

چَکھااور تقدیر کے ماتھے پہ

چمکامہتاب جس کی دمک نے اِن

اندھیری گلیوں کو زندگی بخشی

اور اِس ادھورے خواب کو

مُکمّل بنایا اور مُجھے

…میری پِہچان مِلی

تُم میرے اِن قیمتی خوابوں

کی سچّی تعبیر ہو جو دن

کے ڈھَلتے پِہروں اور چاند

کی مہکتی راتوں میں دیکھے

ہیں جنہیں گُلاب کے پھُولوں

سے سجایا ہے مِحض تُمہارے

لِیۓ  اور اب اِس گُلشن میں

….دیکھو کتنی بہار آئی ے

برستی ہے جب بارش

تو رُکتی ہے کسی

مقام پر لیکن یہ بھی

سچ ہے مُحبّت جب

برستی ہے تو ٹھہرنا

….نہیں جانتی

مہتاب سے روشن

ہے دُنیا جب تک سویرا

جگے لیکن یہ بھی سَچ

ہے چاہت کے نُور میں

آغاز و انجام کی کوئی

….حد نہیں

آفاق پیراہن میں

لِپٹے رنگوں کے سِوا

کُچھ نہیں لیکن یہ بھی

سَچ ہے عشق کے آسمان

میں دُھلتے ہیں رُوح بھی

…جسم بھی

جب جب دل کی دھڑکن تیز ہوتی ہے

اُن گہری پناہوں کو یاد کرتی ہوُں

جب شام سُرخی میں ڈوب جاتی ہے

اُس شرمیلےاِحساس کو یاد کرتی ہوُں

جب آدھے چاند کو مُسکراتا دیکھُوں

اُن شبنمی لَبوں کو یاد کرتی ہُوں

جب جب خوُشبو کا زِکر چِھڑتا ہے

اُس ریشمی لمس کو یاد کرتی ہوُں

جب سِتاروں میں چمک تیز ہوتی ہے

اُن قاتل نگاہوں کو یاد کرتی ہوُں

جب جب دیکھوں رنگوں کی اَور

اُس پُر کشش وجود کو یاد کرتی ہُوں