Month: September 2016

اُن دنوں اُمنگ پہ جب خُمار تھا

خِزاں کی اُڑتی چَڑھتی سُرخی کا

اور جھانکتی تھی بہار دریچوں

سے تب ہوا اُڑا لے جانا چاہتی تھی

…ارمانوں کو پَر تُم نہیں تھے

اَب جب مِلے ہو تو ارمانوں پہ

….بہار ہی بہار ہے

اُن دنوں جب پیاس چاہتی تھی

سمندر سے گھُونٹ پینا اور بُوند

بُوند کی مُحتاج تھی آس تب

احساس جَگتا تھا ڈُوبنے کا

…پَر تُم نہیں تھے

اَب جب ملے ہو تو پُورا سمندر

….میری آغوش میں ہے

اُن دنوں جب ہاتھ بڑھاۓ تھے

چھُونے کو بے باک کلیوں کے بدن

اور جھرتی رہِیں ہاتھوں سے سبھی

آرزوئیں تب ہونٹ چاہتے تھے چُومنا

….پنکھڑیوں کو پَر تُم نہیں تھے

اَب جب ملے ہو تو لبوں کے کھِلتے

…گُلاب صرف پیِنا جانتے ہیں

اُن دنوں جب نۓ راستوں پہ چلتے

پُرانے آنگن میں ڈھلتے چاند کے سرہانے

بیٹھی ہُوئی مدھم حرارت میں چنگاری

ڈھونڈ رہی تھی تب نظریں ترسی تھیں

…اُس روشنی کو پَر تُم نہیں تھے

اَب جب ملے ہو تو ہر شب چاند کی

…کِرنیں سجدے مُجھے کرتی ہیں

اُن دنوں جب شِدّت بدن میں کروٹ لیتی

تھی اور انگڑائی کی نئی جُستجُو جگاتی

تھی کئی خواہشیں تب سانسیں مِٹ جانے

…کو بے چین تھیں پَر تُم نہیں تھے

اَب جب ملے ہو تو دھڑکنوں پہ دستک

….روز کرتی ہیں تُمہاری سانسیں

میں تُم میں تُم سے زیادہ

تُم مُجھ میں مُجھ سے زیادہ

آدھے بھرے پُورے چھَلکے

بِہکے تُم میں مے سے زیادہ

نَس نَس چُبھتا قطرہ نمکیِن

دوڑے مُجھ میں زہر سے زیادہ

تباہ ہے ذات فنا ہے جسم

اُترے تُم میں رُوح سے زیادہ

اشک چھُوتےکنارےجنوں کے

بِہتے مُجھ میں خون سے زیادہ

انجان ہے گُونج سرگوشی سے

ٹھہرے تُم میں سُر سے زیادہ

رات بھر تارے جگتے رہیں

اور صُبح کی نیند پُوری نہ ہو

نظروں میں جُگنو جلتے رہیں

اور روشن کبھی سیاہی نہ ہو

بارش ٹُوٹ کے برستی جاۓ

اور دھُوپ کی آنچ سُنہری نہ ہو

ارماں میں ڈُوبتا جاۓ سمندر

اور پیاس کی حد تھمی نہ ہو

لَب کے پیالے سیراب رہیں

اور شبنمی کَلی پھِیکی نہ ہو

گُلوں میں رنگ خوب سجیں

اور شاخوں کی رَگ ہری نہ ہو

ریشم سے پِگھلے موم سابدن

اور شمعٰ کی لَو دھیمی نہ ہو

تنہائی میں گِھرےگی

تو غُلامی ملے گی

شِدت میں گُھلےگی

تو کسک ملے گی

آہوں میں رُلے گی

تو ضَرب ملے گی

لمحوں میں گِرے گی

تو چھاؤں ملے گی

خواب میں ڈھلے گی

تو بیداری ملے گی

اوس میں دُھلے گی

تو بارش ملے گی

چنگاری میں جلےگی

تو رہائی ملے گی

عشق میں مِٹے گی

تو خدائی ملے گی

وہ سماۓ مُجھ میں تو چندن بنُوں

گر میں اُترُوں تو وہ داستان بن جاۓ

وہ رہے مُجھ میں تو گھر بنُوں

گر میں بسُوں تو وہ سمندر بن جاۓ

وہ سوۓ مُجھ میں تو سویرا بنُوں

گر میں جاگُوں تو وہ خواب بن جاۓ

وہ ٹُوٹے مُجھ میں تو انگڑائی بنُوں

گر میں بِکھرُوں تو وہ کسک بن جاۓ

وہ بَہے مُجھ میں تو لِہر بنُوں

گر میں ڈوُبُوں تو وہ پیاس بن جاۓ

وہ جلے مُجھ میں تو شمعٰ بنُوں

گر میں پِگھلُوں تو وہ موم بن جاۓ

…وعدہ کرو کہ

شبِ ہِجر مُختصر ہوگی

سُرخرُو ہوگا صبرِ قلب

اِنتہا بنے گی حاصلِ سفر

…یاد رہے کہ

رنج و غم حریف ہو جائیں

مِحفلِ لمس چھُوۓ شِدّت

وصلِ مُحبّت یادگار بنے

…بھُول جاؤ کہ

ساحرِ شمعٰ کے سِوا کُچھ ہے

دن و رات وقت کے غُلام ہیں

مُحتاج ہیں ہم بندِشِ فرض کے

یہ میرے شعر نہیں سجدے

ہیں اُس خُدا کو جس نے عشق

کے آسمان میں نوازا ہےمُجھے

…مُحبّت کی رحمتوں سے

یہ میری نظمیں نہیں سلام

ہے اُس پیکر کو جس نے بندگی

کے جہاں میں بخشا ہے مُجھے

…سرُور کی آشنائیوں سے

یہ میری تحریریں نہیں خط ہیں

اُس حسِین کو جس نےاُلفت

کے گُلستان میں سجایا ہے مُجھے

…پُھولوں کی شوخیوں سے

یہ میری غزلیں نہیں اِنعام ہیں

اُس پرِستار کو جس نے عقیدت

کے جہاں میں تراشا ہےمُجھے

…پتھر کی لکیروں سے

صنم کی آنکھ سے گِرتا ہے قطرہ قطرہ

چُن لیا ہے میں نے اِسے موتی سمجھ کر

کنارۂِ رُخسار پہ دَم توڑے انمول اَشک

چُوم لیا ہے میں نے اِسے پھُول سمجھ کر

سُرخ چراغ میں بِہتےدیکھا شرارۂِ تِشنگی

پِی لیا ہے میں نے اِسے شبنم سمجھ کر

سمندر کی روانی میں ڈُوبتا نایاب آنسُو

چَکھ لیا ہے میں نے اِسے مِے سمجھ کر

آج چاند کےچہرے پہ

خوُبصورتی کمال کی ہے

اور میں خوش ہُوں تُم بھی

…یہِیں ہو اور میں بھی

آج چاندنی برسا رہی ہے

پیار شِدّت سے اور میں

خوش ہُوں تُم بھی تَک رہے

…ہو اور میں بھی

آج چاند کے دائرے میں

خُمار ہے بےخُودی کا اور

میں خوش ہُوں تُم بھی نشے

…میں ہو اور میں بھی

آج چاندنی ڈُوبی ہے مستی

کی شوخ ادا میں اور میں

خوش ہُوں تُم بھی مدہوش

…ہو اور میں بھی

آج چاند سُنہری پیاس کی

آگ میں جل رہا ہے اور

میں خوش ہُوں تُم بھی یاد

…کر رہے ہو اور میں بھی

 

ادھُورے پَل آزاد ہوں جب

تو کامِل ہوتی ہے زندگی

بدن جب رُوح  سے ٹکراۓ

تو حاصل ہوتی ہے بندگی

تصویر میں رنگ بھریں جب

تو کامِل ہوتی ہے زندگی

دھڑکن سُنے جب دل کی بات

تو حاصل ہوتی ہے بندگی

کِنارے تَر ہونے لگیں جب

تو کامِل ہوتی ہے زندگی

سانسوں کی ڈور اُلجھے

تو حاصل ہوتی ہے بندگی

ڈُوبتے جائیں جذبات میں

تو کامِل ہوتی ہے زندگی

دو بدن اِک جان بنیں

تو حاصل ہوتی ہے بندگی

حُسن چکھےعشق کے ہاتھ

تو کامِل ہوتی ہے زندگی

جب درد ہو حوالے کسک کے

تو حاصل ہوتی ہے بندگی

بے خُودی شِکست دے خود کو

تو کامِل ہوتی ہے زندگی

صبر جب عرُوج کا زیور پہنے

تو حاصل ہوتی ہے بندگی

دِلکشی چُھپا لے سب راز

تو کامِل ہوتی ہے زندگی

سِتم ٹُوٹےاورلَب مُسکرائیں

تو حاصل ہوتی ہے بندگی

نگاہیں کریں نزرانہ قبُول

تو کامِل ہوتی ہے زندگی

سجدہ ادا ہو مِحبوب کو اگر

تو حاصل ہوتی ہے بندگی