Month: January 2018

…یاد کرتے رِہنا

سِتاروں کی جُنبش کو

ہونٹوں کی لرزِش کو

…بھُول نہ جانا کبھی

کلائی کی دھڑکن

اِس دل کی تڑپن

…تارے گِنتے جانا

جب رات سو نہ پاؤ تو

جب خُود سے لڑ نہ پاؤ تو

…شکایت چھوڑ دینا

بے بسی کی دستک پر

ناکامی کی حَسرت پر

…مُحبّت چھُپا لینا

راستے میں مِلتے ہی

آئینے میں تَکتے ہی

مُدّتوں جلی ہُوں جس تپِش کی چاہ میں

وہ دھُوپ سنبھال کے رکھ لی ہے میں نے

جس موڑ پہ نِشاں مِلیں اُن قدموں کے

وہ خاک سنبھال کے رکھ لی ہے میں نے

بکھرتے شِیشوں میں بس گئی ہے صورت

وہ تصویر سنبھال کے رکھ لی ہے میں نے

جہاں پہ سجدہ گر تھی سِتاروں کی مِحفل

وہ ڈَگر سنبھال کے رکھ لی ہے میں نے

اِدھر سُنائی دیتی رہی صدا تم ہو آس پاس میرے

دوسرے پَل یہ لگا کہ اجنبی بن چُکے ہو تم

اِک اِک لمحے کی مِثال کیا دُوں اے صنم تمہیں

بِصرے پَلوں کے مہماں بن چُکے ہو تم

آج بھی تازہ ہے اُس لمس کی خوُشبو و کسک

یہ سَچ ہے کہ بُہت دُور جا چُکے ہو تم

کہنا یاد سے نہ ستاۓ تُمہیں میری آنکھوں سے

کہ بڑھتے ہُوۓ فاصلوں میں بھی پاس آ چُکے ہو تم

کیوں کر دِیا ہے تنہا مجھے پراۓ شوق میں

مجھے جیتنے کی دُھن میں مات کھا چُکے ہو تم

نہ سمجھنا کہ دل بھُول چُکا ہے دھڑکنا

بس اِسی غلط فہمی پہ چوٹ کھا چُکے ہو تم

اُدھر کا آفتاب یہاں کی چاندنی جُدا ہیں مگر

حد سے آگے دو جہانوں میں سما چُکے ہو تم

کَٹتی جا رہی ہُوں خُود سے میں

جو بھی مُجھ سے جُڑا افسانہ بنا

کھو گۓ لفظ بِکھر گئی سیاہی

جس نے بھی پڑھا مجھے دیوانہ بنا

نہ دوستی ہے نہ کوئی یارانہ اب

جسے اپنا سمجھا وہ بیگانہ بنا

شمعٰ کی آگ سے تھا اُنس جس کو

وہ قاتل نہ دوست نہ ہی پروانہ بنا

خُود کو پِہچان لیا ہے بڑی تگ و دو کے بعد

یہ کرم ہے مُحبّت کا یا پھر خُدا کی مار

اب آئینہ کم دیکھتا ہے وجُود کہ ڈَر لگتا ہے

یہ داغ ہے بدصُورت یا پھر خُدا کی مار

نہ ہِمّت رہی نہ ہی حوصلہ افزائی کے خط مِلے

شاموں پہ گرہن لگ گیا یا پھر خُدا کی مار

گُتر دِیا ہے اُڑتے پَروں کو اپنے ہی ہاتھوں میں نے

اُڑان بے منزل تھی یا پھر خُدا کی مار

خوابوں کو سَچ کرنے چلی تھی خیال کے سہارے

حقیقت نے جگایا ضمیر کو یا پھر خُدا کی مار

ٹُھکرائی جانے والی شمعٰ تو بُجھتی ہی نہیں

انتظار ہے جو لَوٹے گا نہیں یا پھر خُدا کی مار

میں سمجھی مُحبّت کی تھی اُس نے

..نا مُراد وہ تو سیاست نِکلی

یک طرفہ تھی خوش فہمی شاید

..کمبخت وہ تو عداوت نِکلی

شرطوں پہ ہُوا دل کا سودا یقیناً

..بے ُمروّت وہ تو مُلازمت نِکلی

دے ساتھ اگر تو منظور ورنہ الودع

..سِتم گر وہ تو سِیاحت نِکلی

 

مُجھے اِس رُوکھی خاک تلے مرنے دو

تُمہیں مبارک ہو مُسکراتے آسماں

اِس آنچل زِمّے ہیں تنہا شاخ کے پتّے

تُمہیں مبارک ہو دلِ بہار و خزاں

یہاں اندھیر نگری سوۓ پلنگ سرہانے

تُمہیں مبارک ہو مُلائم شبِستاں

کورے ہیں شعر بے جان تحریریں

تُمہیں مبارک ہو حُسنِ داستاں

میرے دامن میں جڑے ہیں کانٹے

تُمہیں مبارک ہو کھِلتے گُلِستاں

زندگی تیری خُود غرضی ایسی دیکھی

وفا کے خط میں پیش عرضی دیکھی

ہاتھ پھیلاتے جوڑتے فریاد دیکھی

دل میں چھُپی سِسکتی یاد دیکھی

لا چاری کے چولے میں بے پرواہی دیکھی

فریب کے قطع تلے سچّی تصویر دیکھی

حسین رُخ پہ سجی بے رُخی دیکھی

اُجلے کفن میں لِپتی سیاہی دیکھی

مِل کر دیکھو گے جب بھی

بِکھرا ہُوا وجُود پاؤ گے

نظر ٹکرا بھی گئی اگر

ٹُوٹا ہُوا آئینہ پاؤ گے

بھٹک گیا قافلہ پھر سے

بھُولا ہُوا راستہ پاؤ گے

دل یاد سے چُور ہو جب

آدھے وصل کا چاند پاؤ گے

جام بن جاتا ہے زِہر

جب کوئی تباہ ہونے لگتا ہے

مُحافظ بنتا ہے قاتل تبھی

جب کوئی تباہ ہونے لگتا ہے

حُسن لگتا ہے بد نُما داغ

جب کوئی تباہ ہونے لگتا ہے

دھڑکتا دل کرےصدا اَن سُنی

جب کوئی تباہ ہونے لگتا ہے

راکھ اُڑھتی رہے شبنم سے

جب کوئی تباہ ہونے لگتا ہے