Shayeri

اُڑتے دل کی دھڑکن نے

جب اِظہار کیا اُس تڑپ

کا جو جل رہی تھی

سانسوں میں کہ یہ آگ

میری ہے تب چُپکےسے اُس

نے کانوں میں یہ کہہ دیا

…کہ تُم میری ہو

ڈُوبتی نظروں میں پوشیدہ

رنگ جب سوال اُٹھانے لگے اُس

سویرے سے جس میں قُربت کی

گرم چھاؤں غرق ہوتی نظرآئی تب

خاموشی سے اُس نے جھانکتے

ہُوۓ آنکھوں میں یہ کہہ دیا

…کہ تُم میری ہو

زُلفوں کے تَپتے بادلوں میں کبھی

اُبھرتے کبھی چُھپتےچہرے

کی نرم شوخیاں اقرار کرتی

رہیِں اُن گُستاخ اداؤں کی جن

کے نقش رُوح میں پیوست پَلوں کے

غُلام بنےتب سرگوشی سےاُس نے

سمیٹتے ہُوۓسانسوں میں یہ کہہ دیا

…کہ تُم میری ہو

پھر سے روشنی چمکے گی

پھر سے پھُول مُسکائیں گے

پھر سے آنگن مہکے گا

پھر سے دِیۓ جگمگائیں گے

…اور میرا دل کِھل اُٹھے گا اُس کے آنے کی خوشبو سے

پھر سے نظر بہکے گی

پھر سے دل دھڑکیں گے

پھر سے قدم رُکیں گے

پھر سے کَلی کِھلے گی

….اور میرا جسم مِہک اُٹھے گا اُس کی سانسوں کی خوشبو سے

پھر سے شام سجے گی

پھر سے چاند سنورے گا

پھر سے حُسن نِکھرے گا

پھر سے آنچ بھڑکے گی

….اور میری رُوح تڑپ اُٹھے گی اُس کے وجود کی خوشبو سے

میں تیری اَگن میں پگھلناچاہُوں

شرط یہ ہے کہ تُو شرارہ بنے

میں تیرے ہونٹوں سے پِینا چاہُوں

شرط یہ ہے کہ تُو مےخانہ بنے

میں تیری نظروں میں لُٹناچاہُوں

شرط یہ ہے کہ تُو قاتل بنے

میں تیرے ہاتھوں میں سجناچاہُوں

شرط یہ ہے کہ تُو سِنگھار بنے

میں تیری زُلف میں چُھپنا چاہُوں

شرط یہ ہے کہ تُو برسات بنے

میں تیری بانہوں میں بہکناچاہُوں

شرط یہ ہے کہ تُو مُحافظ بنے

میں تیرے وجُود میں اُترناچاہُوں

شرط یہ ہے کہ تُو سمندر بنے

میں تیرے قدموں میں بِچھناچاہُوں

شرط یہ ہے کہ تُو خُدا بنے

وہ نہیں آسکا تو کیا ہُوا

خوُشبو میرے ساتھ آئی ہے

اُس کی یاد میں چلتے چلتے

نئی عادت رنگ لے آئی ہے

ستارہ آنکھ کے جلوے نے

پیاس میری اور بڑھائی ہے

پَلٹتےہی اوجھل ہوئی دھُوپ

وہ کِرن جس نے بُجھائی ہے

دےگیاجس پَل کاموقع مُجھے

سوغات میرے حِصّے آئی ہے

چُھپنے لگی ہوں اُس قدم میں

لہر اُس نِشاں میں نہائی ہے

اِن بانہوں سے آزاد ہوتی ہے جب آرزُو میری

جکڑ لیتے ہیں قید میں درد کے بھنور مُجھے

نظروں کی گھنی قُربت جُداہوجب پیمانوں سے

اُداس کردیتی ہیں اندھیروں کی ویِرانیاں مُجھے

دسترس میں نہیں ہوتےکبھی وصل کےموسم

اُڑا لے جاتے ہیں خزاں کے زرد پتّے مُجھے

دَم توڑنےلگوُں اُس کی بَزم سےالوداع لیتےہی

علیحدگی جگاتی ہےخواہش مَرجانےکی مُجھے

دل اُن آنکھوں کو

دیکھنا چاہتا ہے

صرف جن کی

چمک بتاتی ہے کہ

…میں خوبصورت ہُوں

دل اُن باہوں میں

ٹُوٹنا چاہتا ہے صرف

جن کی پناہ گاہ

دیتی ہے گواہی کہ

…میں محفُوظ ہُوں

دل اُن اشکوں کو

پِینا چاہتا ہےصرف جن

کے جذبے اظہار کرتے

ہیں وہ تڑپ جس کی

…میں پیاس ہُوں

دل اُن شعلوں میں

جلنا چاہتا ہے صرف

جن کی لپیٹ یہ

احساس دلاتی ہے کہ

…میں موم ہُوں

دل اُن دھڑکنوں میں

ڈُوبنا چاہتا ہے صرف

جن کی صداؤں میں گُونجتا

ہے ایک وہ نام جس کی

…میں مَلکیّت ہُوں

 

 

 

جب بھی مِلتے ہیں صنم ہر مُلاقات

بدل جاتی ہے اِک خوشبو میں جس

کے کنارروں کی پنکھڑیاں مہکانے

…لگتی ہیں بدن کی ڈالیِوں کو

جب بھی مِلتے ہیں جانم ہر مُلاقات

بدل جاتی ہے اِک کشش میں جس

کی ڈوریں بے اختیار کِھچتی چلی

جاتی ہیں اُن بُلندیوں پہ جہاں سے

…واپسی کا کوئی راستہ نہیں

جب بھی مِلتے ہیں پِیا ہر مُلاقات

بدل جاتی ہے اِک انداز میں جوجگاتی

ہے مدہوشی جس میں بے خود ہوتے

…ہی جان اور تن ڈُوبنے لگتے ہیں

سمندر نِیلا ہے

گہرے بنے پیالے

رات سیاہ ہے

گھٹا بنے زُلف

آنچل سفید ہے

پاکیزہ بنے رُوح

شجر سُرخ ہے

شرابی بنے ڈورے

آسمان سُرمئی ہے

بُلندی بنے یقین

گُلشن ہَرا ہے

شاداب بنے جوبن

پھُول بنفشی ہے

مرمریں بنے بدن

شمعٰ سُنہری ہے

مُحبّت بنے کُندن

چُومتی ہیں بُوندیں جب فرشِ بدن

عرشِ رُوح تک پُہنچتی ہیں دستکیں

شبنمی دن نِکھارے جب چمنِ بدن

گُلشنِ رُوح تک مہکتی ہیں حسرتیں

مِہکش تارہ چُھوۓ جب سطحِ بدن

سمندرِ رُوح تک بِہتی ہیں کروٹیں

حُسن جب لےبانہوں میں وصلِ بدن

آِنتہاۓرُوح تک ڈھلتی ہیں سرحدیں

چُپکےچُپکےسرگوشی سے

کہا تُم نے کانوں میں

دھیمی دھیمی نِیلی سی

لَو میری جلتی گئی

رَگ رَگ میں چُبھتا جاۓ

سُرخ نمک کا کانٹا

رفتہ رفتہ گُزرے ہے

دھُوپ کی رُت میرےسامنے

تَھر تَھر کانپتی آنچ

لڑتی رہی خُود سے یُوں

کَھن کَھن چُومتا کنگن

کرے رُسوا کلائی کو

نَس نَس میں ٹُوٹتی ہے

صَندلی دَردوں کی کَلیاں

ریشمی ریشمی گیِلی سی

برستی رہی پُھوار یُوں

تھوڑا تھوڑا مرتے ہُوۓ

زندگی کو دیکھتے رہنا

زرّہ زرّہ نِشاں بنا

گَلتی گئی رُوح کی دُنیا