Shayeri

حسین ہُوں میں اگر

…تو تُم وہ آئینہ ہو جس میں دیکھ کر مُسکرانا ہےمُجھے

سِتارہ ہُوں میں اگر

…تو تُم وہ رات ہو جس کی آغوش میں چمکنا ہےمُجھے

منزل ہُوں میں اگر

…تو تُم وہ راستہ ہو جہاں سے گُزر کر پُہنچنا ہے مُجھے

دِلکش ہوُں میں اگر

…تو تُم وہ دلکشی ہو جس کے دل میں گھر بنانا ہے مُجھے

تصویر ہوُں میں اگر

…تو تُم وہ مُصوّر ہو جس کے رنگوں میں ڈھلنا ہے مُجھے

سمندر ہُوں میں اگر

…تو تُم وہ تشنگی ہو جس کے لَبوں سے پِینا ہے مُجھے

خیال ہُوں میں اگر

…تو تُم وہ حقیقت ہو جس کی رُوح میں بَسنا ہے مُجھے

گُل رنگ ہُوں میں اگر

…تو تُم وہ ساغر ہو جس میں چھَلک کے ڈُوبنا ہے مُجھے

بُت ہُوں میں اگر

…تو تُم وہ سنگ تراش ہوجس نے تراشا ہے مُجھے

شمعٰ ہُوں میں اگر

…تو تُم وہ تپِش ہو جس کی بانہوں میں پگھلنا ہےمُجھے

روز نئی خوُشبو

…ایک نئی عادَت میں ڈَھل جاتی ہے

روز نیا خواب

…دِکھاتا ہے حسین جلوے کئی

روز نئی صُحبَت

…ایک نئی آوارگی میں بدل جاتی ہے

روز نیا احساس

…کھولتا ہے دَر ارمانوں کے کئی

روز نئی تِشنگی

…ایک نئی آگ میں اُتر جاتی ہے

روز نیا سرُور

…گھولتا ہے خُمار میں رنگ کئی

روز نئی دیوانگی

…ایک نئی آفت میں سِمٹ جاتی ہے

روز نیا زہر

…چبھوتا ہے نَس نَس میں کانٹے کئی

اِس دل سے اُس دھڑکن تک

اِس راہ سے اُس موڑ تک

…مِلوُں گی تُمہیں اُسی راستے پر اپنی بانہیں پھیلاۓ

اِس آہٹ سے اُس قدم تک

اِس پَل سے اُس لمحے تک

…مِلوُں گی تُمہیں اُسی چھاؤں تلے اپنی ذات بِچھاۓ

اِس آنکھ سے اُس نظر تک

اِس لَب سے اُس سانس تک

…مِلوُں گی تُمہیں اُسی سیج پر اپنا آنچل پھیلاۓ

اِس شب سے اُس اُجالے تک

اِس پیاس سے اُس گھُونٹ تک

…مِلوُں گی تُمہیں اُسی جھیل کنارےاپنی آنکھیں بِچھاۓ

اِس دُوری سے اُس قُربت تک

اِس تڑپ سے اُس کسک تک

…مِلوُں گی تُمہیں اُسی دھُوپ تلےاپنی کِرنیں بِکھراۓ

بَند پلکوں میں چُھپاتے ہیں دل کے چین کو

اِس بزم میں ستارۂِ چشم ہے کاجل و چراغ

کروٹ سرہانے بیٹھی ہے تُمہاری یاد لیۓ

اِس شام میں بِساطِ ریشم ہےخواب و رُخسار

بے تابی کےماتھےپہ پہنا ہے تاج عاشقی نے

اِس انجُمن میں حُسنِ طلب ہےعشق و حِصار

دل کے فرش پہ لگا ہے قُربتوں کا رنگین میلہ

اِس مِحفل میں حاصلِ سرُور ہے شمعٰ و خُمار

کیاکوئی احساس اِس سےزیادہ حسین ہوگا؟

…جس کو مُحبّت میں کہتی ہُوں

کیا اُس نظر سے بڑھ کر کوئی چمک ہوگی؟

…جس کو آئینہ میں کہتی ہُوں

کیا کسی دھڑکن میں ایسا شور ہوگا؟

…جس کو تلاطُم میں کہتی ہوُں

کیا کوئی گِرفت اِتنی دلکش ہو سکتی ہے؟

…جس کو قید خانہ میں کہتی ہوُں

کیا کوئی سانس اِتنا رُوح مِہکا سکتی ہے؟

…جس کو صندل میں کہتی ہوُں

کیا کوئی کشِش اِتنی لاجواب ہو سکتی ہے؟

…جس کو مدہوشی میں کہتی ہوُں

کیا دل کے تار ایسے جُڑ سکتے ہیں؟

…جن کو قسمت میں کہتی ہوُں

کیا خواب اِس طرح سَچ ہو سکتے ہیں؟

…جن کو مُعجزہ میں کہتی ہوُں

کیا دُعائیں ایسے رنگ لا سکتی ہیں؟

…جن کو عقیِدت میں کہتی ہوُں

میرے مِحبوب آج تو لکھنے

کا اِرادہ نہ خیال پر ایک

بات بتانی ہے تُمہیں کہ

جو رات لِپٹی تھی چادر

میں وہ راہ ابھی دِکھانی

…ہے تُمہیں

ایک دل کی آہٹ اور کُچھ

بِکھری چاندنی جو پھیلی

ہے سفید آنچل کے سِرکنے

سے کہ ابھی بِندیا کی ٹِم ٹِم

اور پایل کی چھم چھم سُنانی

…ہے تُمہیں

میرے جانم ابھی مایوس شِکن

سے نہ دیکھ اُن گُلوں کو جن

کے ٹوُٹنے سے ہو جاتے ہیں

خواب ریزہ اور شیشے چُور

کہ اِن ٹُکڑوں کی کسک چُبھانی

…ہے تُمہیں

میری تحریر میں ہے تُو اور

صرف تیری داستانیں کہ

رقص کرتی ہیں اُنگلیاں کاغذ

کے بدن پہ جو پیار کرُوں تو

تھام لے کہ پانی پے چل کے آۓ

گی صُبح تو شام کے تکیے تلے

بیٹھے بے شُمارکہانیاں سُنانی

…ہیں تُمہیں

پیمانۂِ نظر

کنارہ سمندر

آبِ گُل رنگ

نشیلے جام

برقِ آہنگ

لہراتی مستی

عکسِ آئینہ

بےداغ رُخ

پسندِ خاطر

چاہت سُہانی

جانِ عالم

ستارہ محفل

پردۂِ دل

رُوح پرور

رگِ جاں

قطرہ اِنتہا

 

ایک اور دن گُزرا اِک

نئی صُبح میں بدل جانے

…کے اِنتظار میں

ایک اور راستہ نِکلا

نئی منزل پہ نکل جانے

…کے اِنتظار میں

کئی نئی کلیاں کِھلیِں

شبنم کو پی جانے

…کے اِنتظار میں

اور کئی شامیں ڈھلیِں

نۓ چاند میں سما جانے

…کے اِنتظار میں

ایک نئی آگ جلی

سانس میں گُھل جانے

…کے اِنتظار میں

اور ایک کروٹ جگی

خواب میں اُتر جانے

…کے اِنتظار میں

کئی نۓ موسم سجے

رنگوں میں مِل جانے

…کے اِنتظار میں

اور کہیِں شمعٰ تڑپی

پروانے میں ڈُوب جانے

…کے اِنتظار میں

یہ سیاہِیاں ہیں کہ فاصلوں میں سفرکرتی شَبِ ہِجر

صبر ہےاِنتہا ہے وقت کی گردش ہے اورکُچھ نہیں

اُڑانوں سے کہو کہ تھام لو روک لو رفتارِ آرزُو

نَمی ہےدرد ہےجنون کی سازش ہےاورکُچھ نہیں

زمانے گُزرتے ہیں بند پلکوں میں لیۓ احساسِ لمحہ

سیلاب ہےروانی ہےرُوح کی لرزش ہےاورکُچھ نہیں

بھنور لپیٹے پیروں میں لیۓ پِھرتی ہے دردِ آشنائی

فُرقت ہےانتظار ہےجبرکی آزمائش ہےاورکُچھ نہیں

کانپ جاتی ہے ذات

اُس کسک کی حرارت

میں گُھل کے تب جسم

نہیں جانتا کہ رُوح

…کس کی ہے

لرَزتے ہاتھوں سے پِھسلتی

جان گواہ ہے اُس دُھوپ

کی جس میں جل کے سورج

نہیں جانتا کہ تاثیِر

…کس کی ہے

کانپتے احساس کی سرد حِدّت

میں سِمٹا وہ پل جس کو چَکھ

کے زائِقہ نہیں جانتا کہ مِٹھاس

…کس کی ہے

لَرزتے ہونٹوں کی پیاس چُھوتی

رہی کنارے اُس پیمانے کے جس

کےنشے میں غرق ہو کر دل

نہیں جانتا کہ دھڑکن

…کس کی ہے