Shayeri

خواب آنکھوں میں بند

ایک تصویر کی مانِند

ہیں جن کے رنگ اپنی

شناخت میں بے مثال ہیں

اور اِن کی شوخی سے

جب میری نیند کروٹ لینے

لگتی ہے تب کُھلتے ہیں

نۓ دریچے جن سے

…نظر آتی ہیں جَنّتیں

خود کو سونپتے ہُوۓ

اِن جَنّتوں میں جب

سبز ہواؤں کے شور

تلے لہرانے لگُوں تب

وہ حسین وجُود باہیں

پھیلاۓ اِس ریشمی آنچل کا

….اِنتظار کر رہا ہوتا ہے

رات کے اِس ادھُورے

پِہر جب چمپئ پھُولوں

میں لِپٹے دو بدن خوابوں

میں بسے سراب کو چھُو

رہے ہوتے ہیں تب ایک

ہلکی سی آہٹ چونکا دیتی

ہے اور آنکھ سے پَلک کا

رِشتہ فاصلوں میں بدل جاتا

ہے اور وہ پُرکشش چہرہ

اُسی کُہرے میں واپس

…لَوٹ جاتا ہے

پھر ایک دن نہ خواب آیا

اور نہ ہی پلکوں نے فُرقت کا مزا

چَکھااور تقدیر کے ماتھے پہ

چمکامہتاب جس کی دمک نے اِن

اندھیری گلیوں کو زندگی بخشی

اور اِس ادھورے خواب کو

مُکمّل بنایا اور مُجھے

…میری پِہچان مِلی

تُم میرے اِن قیمتی خوابوں

کی سچّی تعبیر ہو جو دن

کے ڈھَلتے پِہروں اور چاند

کی مہکتی راتوں میں دیکھے

ہیں جنہیں گُلاب کے پھُولوں

سے سجایا ہے مِحض تُمہارے

لِیۓ  اور اب اِس گُلشن میں

….دیکھو کتنی بہار آئی ے

برستی ہے جب بارش

تو رُکتی ہے کسی

مقام پر لیکن یہ بھی

سچ ہے مُحبّت جب

برستی ہے تو ٹھہرنا

….نہیں جانتی

مہتاب سے روشن

ہے دُنیا جب تک سویرا

جگے لیکن یہ بھی سَچ

ہے چاہت کے نُور میں

آغاز و انجام کی کوئی

….حد نہیں

آفاق پیراہن میں

لِپٹے رنگوں کے سِوا

کُچھ نہیں لیکن یہ بھی

سَچ ہے عشق کے آسمان

میں دُھلتے ہیں رُوح بھی

…جسم بھی

جب جب دل کی دھڑکن تیز ہوتی ہے

اُن گہری پناہوں کو یاد کرتی ہوُں

جب شام سُرخی میں ڈوب جاتی ہے

اُس شرمیلےاِحساس کو یاد کرتی ہوُں

جب آدھے چاند کو مُسکراتا دیکھُوں

اُن شبنمی لَبوں کو یاد کرتی ہُوں

جب جب خوُشبو کا زِکر چِھڑتا ہے

اُس ریشمی لمس کو یاد کرتی ہوُں

جب سِتاروں میں چمک تیز ہوتی ہے

اُن قاتل نگاہوں کو یاد کرتی ہوُں

جب جب دیکھوں رنگوں کی اَور

اُس پُر کشش وجود کو یاد کرتی ہُوں

شِدّتِ جنون ہو دھُوپ میں اگر تو آفتاب خُود غرض کیسے

وہ بے خبر نہ جانے ہے اُس کی ذات سے کتنے تن جل گۓ

بے مثال حُسن و شباب جگا بھی دیں احساسِ بےخُودی اگر

اِس لا عِلمی کی غَفلت میں نہ جانے کتنے دل فنا ہُوۓ

قیدِ آشنائی کے خنجر سے بھلا کوئی بچ سکا ہے آج تک

اِس خُود کُشی کی چاہ میں نہ جانے کتنے بے موت مارے گۓ

دِلفریب سبھی نظر آتے ہیں داغ نُمایاں بھی اور پوشیدہ بھی

اِس سوغاتِ بےاختیاری میں نہ جانے کتنےمرہم ضائع ہُوۓ

قطرہ قطرہ ٹَپکتا ہےلہؤِ جگر گرچہ طلب بڑھتی جاۓ ہے

اِس پاگل پن کی حد میں نہ جانے کتنے ارمان پیاسےلُٹے

قندیل میں چھُپی شمعٰ کو پگھلنے کی اِجازت بھی نہیں

اِس سُنہری پناہ گاہ میں نہ جانےکتنے پروانوں کے وِرد ٹُوٹے

آج پھر اُسی مقام پر رُکنا پڑا جہاں سے تھی چلی

آگے کُہرے ہیں جہاں دیکھوں پیچھے دشت کی تِیرگی

خس و خاک کے ڈھیر تلے بے جان رُوحوں کی صدائیں ہیں

سامنے موت ہے مُنتظر باہیں پھیلاۓ تو پیچھےکفنِ زندگی

فِہرستِ دُشمناں میں ہمدم ہیں بے شُمار جہاں دیکھوں

یاں سازِشوں کے پھَندے ہیں واں دامِ تزویر کی سیاہی

تنِ بے ضمیر میں مَکفُوف مَیّت کو نہیں سہارے کی آرزو

اندر گُھٹن جکڑے ہے نفس کو باہر سِسکتی ہے خامِشی

زہرِ عشق کے کڑوےگھُونٹ نس نس میں اُترتے جاتے ہیں

آگے نرمئِ آغوشِ پیکرِ جاناں پیچھےفیصلِ تقدیر کی ناگُزیری

بے تاب ہوں اُن نظروں

میں سمانے کو جن کے

مِلتے ہی بھُول جاتی ہوں

کہ گِہری جھیلوں میں ڈوبنے

….کا خوف ہے

بے چین ہُوں اُن باہوں میں

ٹُوٹنے کو جن میں گُم ہوتے

ہی یہ یاد نہیں رہتا کہ

فقط آنچل میں حُسن

….مِحفوظ ہے

بے قرار ہوں اُن سانسوں

میں دم توڑنے کو جن میں

بس کے یہ یقین اُٹھ جاتا

ہے کہ گُلوں میں مِہک

…زیادہ ہے

بے صبر ہوں اُس ساۓ

میں غرق ہونے کو جس میں

چُھپ کر یہ احساس کھو

جاتا ہے کہ ہم دو

…جِسم ہیں

بے پرواہ ہوں اُن شعلوں

میں جلنے کو جن کی گرمی

میں پِگھل کے یہ خیال نہیں

ستاتا کہ شمعٰ خُود سے

…جلتی نہیں

سمیٹ کر درد باہوں میں خوشیاں بکھیرتی ہوں

دل کے آسمان پہ چاہتوں کے پھُول سجاتی ہوں

بے چین لمحوں کی دھُوپ چھاؤں در گُزر کرتےہُوۓ

مُسکراہٹوں کےچمکیلےآنچل میں ستارے لپیٹتی ہوُں

تپتی ریت کی جلن سے خود کو بچاتے چل نِکلوں

مِہکتی برسات کے موتیوں سے جسم بھگوتی ہوں

رنج و غم سے جب چھلنی ہونے لگتی ہیں سانسیں

روح کے مخملی جھرونکوں میں مُحبّت سمیٹتی ہُوں

پِگھل کر جب شمعٰ نہانے لگتی ہے آنسوُؤں میں

حِدّتِ چنگاری کے جواں جوبن سے ذات سُلگاتی ہوُں

پلکوں کی چھاؤں میں تڑپتی راتیں

وہ سِتاروں کی روشنی میں لِپٹی چاندنی

اُن یادوں کے سرہانے سمٹی خواہشیں

آغوش کے سایوں میں دو دھڑکتے جذبات

…وہ حسین لمحے نہ ختم ہونے والے سِلسلے

دُعا میں پھیلے ہاتھ ہوں جیسے

سجدےمیں گِرتے گڑگڑاتے ہوں جیسے

خزاں کے سُرخ زرد پتّوں کی زندگی

سُرمئی شام کی آخری کرن ہو جیسے

….وہ حسین لمحے نہ ختم ہونے والے سِلسلے

خوُشبو سے مُعطّر پیروں کی مہندی

احساس کے بِچھونے میں رُوح کی گرمی

شفافیّت میں گھُلی آئینے کی شبی

بارش کی پہلی بُوند جب ہونٹ کو چُبھی

…وہ حسین لمحے نہ ختم ہونے والے سِلسلے

بے تاب آرزو میں لِپٹی کوئی تمنّا ہے

ادھورے عکس کی کیفیّت سے لڑتی رہی

وہ نا مُکمّل رہی اُس آگ میں جل کے

کائینات کی روشنی میں چُھپی کسک ہو جیسے

…وہ حسین لمحے نہ ختم ہونے والے سِلسلے

تیرے ساۓ سےکوئی مراسِم نہیں اب تو

پِھر سے یہ رشتہ بنا لوُں تو کیا ہو

میرے خیال ریزہ اور خواب حیات ہیں

گر نیند سے ہی نہ جاگوں تو کیا ہو

زندگی میں مقام آ رہا ہے پھر سےشاید

خوُد سے گر میں جی لگا لوُں تو کیا ہو

خزاں سے جو کسک اُدھار دی تھی تُم نے

اُسی راستے کو منزل بنا لوُں تو کیا ہو

میرے شب و روز پہ طاری ہے ہر دم وہ

اِس قید سے گر جاں چھُڑا لوُں تو کیا ہو

اِس میں سزا ہے اُس کی رضا کے ساتھ

فقط خُدا سے عشق لگا لوُں تو کیا ہو

پگھلتی جا ہی ہے شمعٰ آہستہ آہستہ

اِس تپش سے رُوح جلا لوُں تو کیا ہو

یہ شور مچاتے پیڑ

یہ لِہراتی مست ہوائیں

یہ گِیلی مِٹّی کی خوشبو

….اُسے میری یاد تو دلاتے ہوں گے

یہ ٹَپ ٹَپ ناچتے قطرے

یہ مچلتی شوخ آندھی

یہ پُر کشش نظارے

….اُسے میرا پتا تو دیتے ہوں گے

یہ اَشک بہاتی برسات

یہ گھنگور سیاہ گھٹائیں

یہ پلکیں جھپکاتی بِجلی

….اُسے میرا حال تو سُناتے ہوں گے