Shayeri

زندگی کے راستےکٹھِن ہوں اگر

ہَمسفر ہو تُم بس یہی کافی ہے

کنارۂِ دل چھلنی  ہو جاۓاگر

ہَم نَفس ہو تُم بس یہی کافی ہے

رنج و غم گر محبوب ہونے لگیں

ہَم پہلُو ہو تُم بس یہی کافی ہے

چھلَکنے لگیں آنسو تو کیا ملال

ہَمدرد ہو تُم بس یہی کافی ہے

دِلکش نہ سہی نغمہ و شعر اکثر

ہَم سُخن ہو تُم بس یہی کافی ہے

اُن آنکھوں کو یاد کرتی ہوں

جن کے آئینے میں اپنا عکس

دیکھ کے بھُول جاتی ہوں

….کہ میں کون ہوں

اُن ہاتھوں کو یاد کرتی ہوں

جن کو تھامتے ہی یہ احساس

جگتا ہے کہ پُوری کائنات باہوں میں

….سِمٹ آئی ہو جیسے

اُن ذُلفوں کو یاد کرتی ہوں

جن کی خوشبو میں بسےمیری تقدیر

کے گھنے ساۓ ہیں جن میں کھو کے

….میں بے سُدھ ہو جاتی ہوں

اُن لفظوں کو یاد کرتی ہوں

جن کے سُنتے ہی اُفق سے پھُول برسنے

لگتے ہیں اور میرے وجود کے درودیوار میں

….جھنکار بجنے لگتی ہے

اُن ہونٹوں کو یاد کرتی ہوں

جن کو چھُوتے ہی ہوش اُلجھنے لگتا ہے

تب خُمار کی سیڑھی چڑھتے یہ خیال نہیں

….آتا کہ پیاس کی حد کیا ہے

اُن خُوبرو نظاروں کو یاد کرتی ہوں

جن کے نُور سے میری رُوح کا آسمان

چمکنے لگتا ہے تب میں ، میں نہیں رہتی

….تُم بن جاتی ہوں

آج پھر ایک نئی اُمید بنی

اور مایُوسی پروان چڑھی

آج پھر دھڑکن زندہ ہوئی

اور پھرسے شیشے ٹوُٹے

آج پھر پُرانےدرد جگے

اورخوُد کو بہلایا میں نے

آج پھر شام ڈھلی نہیں

اورنئی صُبح طلُوع نہ ہوئی

آج پھر پرچھائی کو اوڑھا

اور نئے ساۓ میں گُم ہوئی

آج پھر اُس کو یاد کیا

اور اپنے آپ کو بھُول گئی

کیا اِن باہوں سے دُور رہ سکو گے؟

کیا اِن پناہوں سے دُور رِہ سکو گے؟

جن سانسوں میں کروٹ لیتے تھے

اُن خوابوں سے دُور رِہ سکو گے ؟

سِتاروں کی محفل جو سجائی تھی

اُن شاموں سے دُور رِہ سکو گے؟

پیاسی آنکھیں بُلاتی ہیں تُمہیں

اِن اُجالوں سے دُور رِہ سکو گے؟

جن شعروں میں جُستجو ہو تُمہاری

اُن افسانوں سے دُور رِہ سکو گے؟

ختم نہ ہو کبھی لگن یہ میری

اِن انتہاؤں سے دُور رِہ سکو گے ؟

آئینے میں چہرہ جو دیکھتے تھے

اُن سرابوں سے دُور رِہ سکو گے ؟

خود کو کھو چُکے ہو جس دل میں

اُن دھڑکنوں سے دُور رِہ سکو گے؟

شام ہوتے ہی پھُول اُسے چُومتے ہیں

رات ڈھلتے چاندنی اُسے نہلاتی ہے

ستارے اُس کے آنچل میں سِمٹ آتے ہیں

آفتاب اُس کے بدن سے کِرنیں سیکتا ہے

…..کیونکہ گُلبدن اُسے کہتے ہیں

سویرا اُسے شبنمی تاج پہناتا ہے

ہوائیں اُس سے خوُشبو اُدھار لیتی ہیں

نرم چھاؤں اُس کی ذلفوں کو سہلاتی ہے

اُس کی آنکھوں میں مے رس گھولتی ہے

….کیونکہ مہجبیِن اُسے کہتے ہیں

بارش اُس کے عشق میں بےاختیار برستی ہے

اُس کی پایل سے سرگم بجنے لگتے ہیں

چوُڑیاں رقص کرتی ہیں اُس کی کلائی پہ

اُس کی مُسکراہٹ میں دھنک کے رنگ شامل ہیں

…..کیونکہ بہار اُسے کہتے ہیں

گجرے کی کلیاں مہکاتی ہیں وجُود اُس کا

سمندر اُس کی گہرائی میں ڈُوب جاتا ہے

اُس کے ہونٹ آبِ حیات کا پیالہ ہیں

مہندی اُس کی ہتھیلی پہ رنگ سجاتی ہے

….کیونکہ گُلزار اُسے کہتے ہیں

مکَمّل ہوتے ہی رنگِ تصویر چُھپنے لگے ہیں کناروں میں

سُرخ گُلاب  کبھی زرد تو کبھی صفا ہُوۓ جاتے ہیں

محفلِ رنگ سجائی ہےکاغذ کےپھُولوں سےکہ برقرار رہے

مہکتے گُلشن  کبھی دشت تو کبھی صحرا ہُوۓ جاتے ہیں

بےجان بُت تراش کر پچھتاوےکی ڈور سے بندھ گئی زندگی

سنگ تراش کبھی  بشَر تو  کبھی خُدا ہُوۓ جاتے ہیں

عجب حُسن و شباب کی پھیکی رونقوں سےلُبھاتےہیں ذات کو

تماشائی کبھی زہر تو کبھی دوا ہُوۓ جاتے ہیں

ڈوبتی ہوئی دھڑکن کی تال

پہ گُم ہوتے لمحے مدہوش ہونے

لگتے ہیں جب دو جسم باہوں میں

….دَم توڑنے لگیں تو

پیاسے جذبوں میں گُھلتی کسک

پُوری ہونے لگتی ہے جب نشے میں

چُور دو بدن سانسوں میں

…..دَم توڑنے لگیں تو

سُہانے سِلسلوں کی چھاؤں

تلے احساس تڑپنے لگتے ہیں

جب ریشم میں لِپٹے دو وجود

…..دَم توڑنے لگیں تو

 

تُمہیں سوچیں تو مُسکرانے لگتے ہیں یہ لَب

اِس خیالِ جنّت سے نہ کوئی نکالے اب ہمیں

تُمہیں دیکھیں تو چمکنے لگتی ہیں یہ آنکھیں

اِس مِحفلِ کہکشاں سےنہ کوئی نکالےاب ہمیں

تُمہیں پا کےیوں بےاختیار اِترانےلگتا ہےیہ دل

اِس نازِ خوُد پسندی سے نہ کوئی نکالےاب ہمیں

تُمہیں چھُو لیں تو پگھلنے لگتے ہیں یہ جان و تن

اِس لمسِ خوشبو  سے نہ کوئی نکالے اب ہمیں

اِن بے خود گھٹاؤں کی

گڑگڑاہٹ میں جس کی

صدائیں مُجھے بلاتی ہیں

وہ شخص میرے دل کے

….موسموں کا سَبب ہے

یہ چھیڑتی مَست ہواؤں

کے رُخسار میں جس کا

لمس چُپکےسے میرے بدن

کو چومتا ہے وہ شخص

میرے حُسن کی

….راحتوں کا سَبب ہے

قطرہ قطرہ ٹپکتی بوُندوں

کی جھنکار میں بسی

تپِش جس کی حِدّت سے

مدہوش بناتی ہے وہ شخص

میری جلتی بُجھتی

….آہوں کا سَبب ہے

 

 

 

تُمہیں چاہنے کی حد میں ہر اِنتہا سےگُزر بیٹھے

اِس مُحبّت میں جنون تُمہیں لے جائیگا نئی دُنیا میں

ستاروں کے جہاں میں تُمہیں سجدے کرتی ہے یہ ذات

اِس اُلفت میں عبادت تُمہیں لے جائیگی نئی دُنیا میں

پیکرِ عشق کا خُدا بنا چُکے ہیں سحر و شب کا تُمہیں

اِس بندگی میں سرُور تُمہیں لے جائیگا نئی دُنیا میں

تُمہیں نرم آنچ کی مدھم حرارت میں بِھگونا ہے ہر پل

اِس تمازَت میں شمعٰ تُمہیں لے جائیگی نئی دُنیا میں