Shayeri

گِرفت میں ہے مۓِ آتِش کہ چھَلک نہ جاۓ کہِیں

پِیتے پیتے ایک مُدّت  ہی نہ گُزر جاۓ  کہِیں

بھرے پیمانوں میں تیرتی ہیں پنکھڑیاں کنول کی

ڈُوبتے ڈُوبتے ایک مُدّت ہی نہ گُزر جاۓ کہِیں

غُنچۂِ دل ہے شگُفتگی کے طلِسمات سے مَخموُر

مُسکراتے مُسکرات ایک مُدّت ہی نہ گُزر جاۓ کہِیں

صندل بنے اُس وجُود کی رحمت سے پیراہنِ جاناں

مِہکتے مِہکتے ایک مُدّت ہی نہ گُزر جاۓ کہِیں

آغوشِ صنم میں بِکھر رہے ہیں کِنارۂِ جسم و جاں

سِمٹتے سِمٹتے ایک مُدّت ہی نہ گُزر جاۓ کہِیں

 

اِن خوابوں کے جھمیلوں میں

جب سَچ کی دُھول اُترتی ہے

اور تلخ کڑوی پیاس کوئی جب

گھُونٹ بن کر اَٹکتی ہے تب

حقیقت کے سفید ورقوں پہ

سیاہی کا رنگ جب چڑھتا ہے

پھر چند جھُوٹے کِردار اور نقلی

افسانے پروان چڑھتے ہیں

اور اِن بے جان رُوحوں میں

جَگتی ہیں بناوٹی جِسموں کی

راکھ اور پِھر ہاتھوں کی لکیریں

…..مدھم نظر آنے لگتی ہیں

سُہانے پَلوں سے لِپٹے شاخ

کے جھُولتے سبز پتّے اور

اُن کے رس کو پیتے ہُوۓ

زرّہ زرّہ جب بھرنے لگے

نسوں میں زہر کا نشہ

تب دُور کہیں ایک فاختہ

اپنے پَر کٹنے کا جشن منا رہی ہوتی

ہے جِس کی اُڑان اِک حسرت

میں قید اُس آندھی کی شِدّت

اُڑا لے جاتی ہےاور تب

اُس کے آدھے مظبُوط اور

پُورے اِرادے جب ٹُوٹتے نظر

آئیں تب اُسے اپنی تقدیر

…..مدھم نظر آنے لگتی ہے

وہ لِکھے کورے کاغذ پہ مُجھے اور غرق ہونے لگوں

یہ سَچ ہے میں اُس کی غزل جیسی دِکھتی ہوں

خُود کو پایا ہے اُس کی شناخت میں بے حساب

یہ سَچ ہے میں اُس کی کہانی جیسی دِکھتی ہوں

اُس کی نظر سے دیکھوں بے تحاشہ حُسنِ رنگینیاں

یہ سَچ ہے میں اُس کے موسموں جیسی دِکھتی ہوں

اُس کی گُفتگو سے عیاں ہے میری داستانِ آشنائی

یہ سَچ ہے میں اُس کی نظم جیسی دِکھتی ہوں

اُس کے قدموں کے نِشاں میں میری تقدیر پِنہاں ہے

یہ سَچ ہے میں اُس کے ساۓ جیسی دِکھتی ہوں

اُس کے عکس میں تشبیہِ شمعٰ چمکتی ہے ہر سُو

یہ سَچ ہے میں اُس کے آئینے جیسی دِکھتی ہوں

یہ رات کیوں ہوتی ہے؟        یہ شام کیوں ڈھلتی ہے؟

یہ دن کیوں نِکلتا ہے؟           یہ فِضا کیوں چلتی ہے؟

یہ رنگِ عشقِ کائنات ہیں ، اِن میں کھو جائیں

یہ پرِندے کیوں چِہچہاتے ہیں؟      یہ بادل کیوں گڑگڑاتے ہیں ؟

یہ آندھیاں کیوں مچلتی ہیں؟     یہ بِجلیاں کیوں چمکتی ہیں؟

یہ حُسنِ عشقِ کائنات ہیں ، اِن میں سِمٹ جائیں

یہ نظر کیوں بِہکتی ہے؟        یہ سانس کیوں اُکھڑتی ہے؟

یہ دل کیوں دھڑکتے ہیں؟         یہ جذبات کیوں تڑپتے ہیں؟

یہ صباحتِ عشقِ کائنات ہیں ، اِن میں نِکھر جائیں

یہ پُھول کیوں کِھلتے ہیں؟        یہ رنگ کیوں بِکھرتے ہیں؟

یہ آگ کیوں جلتی ہے؟            یہ پیاس کیوں بڑھتی ہے؟

یہ مُعجزۂِ عشقِ کائنات ہیں،  اِن میں سنور جائیں

یہ چاند کیوں چمکتا ہے؟        یہ سمندر کیوں ڈُوبتا ہے؟

یہ جھرنے کیوں بِہتے ہیں؟         یہ شَمس کیوں نِکلتا ہے؟

یہ فِردوسِ عشقِ کائنات ہیں ، اِن میں اُتر جائیں

یہ جسم کیوں پگھلتا ہے؟           یہ ساز کیوں بَجتا ہے؟

یہ رُوح کیوں کھِچتی ہے؟           یہ خواب کیوں بُنتی ہے؟

یہ معرفتِ عشقِ کائنات ہیں،  اِن میں مِٹ جائیں

یہ اُنس کیوں ہو جاتا ہے؟         یہ آنکھ کیوں ٹکراتی ہے؟

یہ زُلف کیوں لِہراتی ہے؟          یہ آہٹ کیوں چونکاتی ہے؟

یہ دولتِ عشقِ کائنات ہیں ، اِن میں چُھپ جائیں

میرے گھر کے

آنگن میں جب

چاند کِرنیں چمکاتا

ہے اور کِھلکھلاتی

رات کے بدن پہ

اپنے گُلابی ہونٹوں

سے مُہر لگاتا ہے

تب مِہکتی ہے اِس

حُسن کی چاندنی

اور جلتے ارمانوں

کے کھیل تلے بس

ایک ہی خیال آتا ہے

….. کہ رُک جاؤ ٹھہر جاؤ ، تھام لو یہ لمحہ

ناچتی بارش کی

بُوندوں سے جب

عَرش پیار برساتا ہے

اور چھم چھم سُریلے

تاروں کی سرگم سی

بجنے لگتی ہےتب بے خُود

سمعٰ ہو جاتا ہے پھر

یوُں ہی دو مخموُر بدن

نشے میں جُھومنے

لگتے ہیں اور دل میں

یہی خیال آتا ہے

….کہ رُک جاؤ ٹھہر جاؤ ، تھام لو یہ لمحہ

نظرِگُلفام سے اِلتماس ہے کہ لَوٹ آۓ پناہوں میں

کہ زینتِ چاندنی کو خواہش ہےاور چمکنے کی

گُلستانِ اُلفت ڈھُونڈے ہے خوُشبؤِ یار کی گَلیاں

کہ نِگہتِ خُوشگوار کو تمّنا ہے اور مِہکنے کی

بے ساختہ لمحوں کی قید چاہتے ہیں نرم لمس

کہ شِہرِ ذات کو آرزو  ہے اور بِکھرنے کی

نِشانِ قدم چُنتی ہے گرم خاک اپنی پلکوں سے

کہ اِنتہاۓ شوق کو تِشنگی ہے اور پِگھلنے کی

فنا کرتی ہے تباہ کرتی ہے روز یہ تیری آواز

سفر کرتی ہے رُوح کو چِھڑاتی یہ تیری آواز

نہ جلاتی ہے نہ بُجھاتی ہے نہ مرنے دیتی ہے

اثر کرتی ہے تن بدن کو تڑپاتی یہ تیری آواز

جامِ سرگم پیتے ہیں قطرہ قطرہ اِن کی بدولت

بَسر کرتی ہےپیاس کو بڑہاتی یہ تیری آواز

کانوں کی دہلیز پہ دم توڑتی یہ سرگوشیاں

رقص کرتی کسکِ شمعٰ کو پگھلاتی یہ تیری آواز

مُحبّت میں سجدہ مِحبوب کو ہو تو کافر لوگ کہتے ہیں

پِھر کیوں تمام عالم جنونِ عشق کی داستان میں مست ہُوا جاتا ہے؟

مُحبّت کی چاہ میں اِظہار گر عبادت سے بیاں ہو تو خوُب ہے

پِھر کیوں تمام عالم شور میں چھُپی خاموشی کو ادا سمجھتا ہے؟

مُحبّت جذبۂِ پاکیزگی کے دھاگے میں پِرویا مُتبّرک تعویز ہے

پِھر کیوں تمام عالم آرزؤِ مِٹّی پانے کی تمنّا میں سزا دیتا ہے؟

مُحبّت درجاتِ اٰعلیٰ کی بلند مِثال ہے جو عرش کے سرہانے مِلتی ہے

پِھر کیوں تمام عالم اِسے پیروں کی خاک تلے روندتا چلا جاتا ہے؟

---

! جُھکی نظروں سے پوچھے کوئی کہ شاموں پہ جوبن کس کا ہے

اُجالوں پہ کبھی سیاہی کی چادریں فریفتہ ہُوئی ہیں کیا؟

! بے داغ چمک سی چَھنتی جا رہی ہے کسی کے حُسنِ نُور سے

ستاروں پہ کبھی آفتاب کی کرنیں فریفتہ ہوئی ہیں کیا؟

! جواں افسانے انوکھے جال میں بندھی گردش کے مُحتاج ہیں

عاشقوں پہ کبھی اَنا کی بارشیں فریفتہ ہوئی ہیں کیا؟

! شمعٰ کی لپیٹ میں کس قدر مدہوش ہوُۓ جاتے ہیں سُرخ گلاب

پروانوں پہ کبھی ہوا کی بدلیاں فریفتہ ہوئی ہیں کیا؟

دیکھتی ہُوں ! اِک مچلتی لِہر

دوڑتی آرہی ہے دُور تلک

سما جانے کو لُٹ جانے کو

اپنے معشُوق کی باہوں میں

اُس کی شِدّت میں پوشیدہ

طوفان ہے اور جنون سی تیزی بھی

سرسراتی جِھلملاتی موجیں

اُبھرتے جذبات لیۓ ایک نۓ

کھیل کو جگا رہی ہیں

یہ تیرا ذِکر ہے شاید جو

موجیں مستانی ہُوئی جاتی ہیں

اُف! تیری بے مِثال داستانیں

یہاں بھی گھیرے ہیں مجھے ہر دم

خُود سے مُحبّت کرنے لگی ہوں میں بھی

کیونکہ تیرا وجُود اب شامل ہے

مُجھ میں اِن موجوں کی طرح جو

گواہ ہیں میرے قتل کی

تیرے پیغام لے کے آتی ہیں

شاید یہ لِہریں ، کیا کہنے

کیا تُجھ تک کوئی مُحبّت نامہ

پُہنچا ہے ابھی تک ؟