Shayeri

وہ سمجھ کے پیِتا رہا لہُو آبِ حیات کو

جسم اُس کا تھا رُوح منسُوب تھی مجھ سے

میرے ہونے نہ ہونے کی کیا شناخت رہی اب

نام اُس کا تھا ذات منسُوب تھی مجھ سے

کچھ درد کا حِصّہ اور خط میں لِپٹے آنسو

عُنوان اُس کا تھا داستان منسُوب تھی مجھ سے

خواہش کے سمندر میں ڈُوبی فقَط میری ہستی

شِکارہ اُس کا تھا لِہر منسُوب تھی مجھ سے

نہ چاہا کچھ سِواۓ چاہنے کی تِشنگی میں

جام اُس کا تھا خُماری منسُوب تھی مجھ سے

آنکھ میں چُبھتا پَل ٹِھہر گیا ڈَر سے شاید

فیصلہ اُس کا تھا خامِشی منسُوب تھی مجھ سے

بیداری ہو عشق میں تو بے زار ہو جاتی ہے لگن

خُدا اُس کا تھا عبادت منسُوب تھی مجھ سے

کُچھ پُوچھ بھی لیں اگر تو غم نہ کرنا

یہ ادا ہے مُحبّت کی کوئی شکوہ تو نہیں

ڈُوبتے فاصلوں میں حسرتیں زندہ رہیں

یہ وفا ہے مُحبّت کی کوئی شکوہ تو نہیں

خاموش رہے زُباں ستم سہنے کے باوجود

یہ جزا ہے مُحبّت کی کوئی شکوہ تو نہیں

جواب سے نہ پُوچھ سوال میں چھُپے بھید

یہ رضا ہے مُحبّت کی کوئی شکوہ تو نہیں

یہ لَب یہ نظر اور آرزوؤں میں مانگا ہُوا پل

یہ دُعا ہے مُحبّت کی کوئی شکوہ تو نہیں

ہم تو عشق کے ہیں دیوانےاور کچھ نہیں چاہیۓ

چند لفظ اور افسانے ورنہ کچھ نہیں چاہیۓ

نہ کوئی گِلہ نہ شکوہ بس ٹھِہرتی نظر چاہیۓ

جس راہ میں تیری خوُشبو ہو وہ سفر چاہیۓ

نِیّت پہ گُماں کیسا ہمیں  تو بس عَمل چاہیۓ

ایک یاد میں تصوّر اور دل میں تصویر چاہیۓ

نہ کوئی بیاباں نہ ہی کھِلتا گُلِستان چاہیۓ

ایک تنہا کیاری میں مُسکراتا خیال چاہیۓ

دیتے ہیں دِلاسا خُود کو مگر سچّا چاہیۓ

دیکھتےآئینے میں چہرہ مُجھےاُس کا چاہیۓ

بھرتے پیمانے سے چھلکتے ارمان چاہیۓ

خالی جام سے جھانکتےپیاسے شباب چاہیۓ

میں حسین ہوتی اگر تو

وہ بھُول جاتا کہ صبر

کی شاخ پہ بے خُودی

…کیسے دستک دیتی ہے

میں ہوتی اگر پری تو

وہ بھُول جاتا کہ کہانی

کیسے حقیقت کے پردے

…فاش کرتی ہے

میں چاندنی ہوتی اگر تو

وہ بھُول جاتا کہ عکس

میں کیسے رات

…جھانکا کرتی ہے

میں ہوتی گر پُرکشِش تو

وہ بھُول جاتا کہ گُناہ کی

سرحد کس راستے لے جا کے

…دَم توڑتی ہے

میں ساحرہ اگر ہوتی تو

وہ بھُول جاتا کہ بس میں

کرتی جان کیسے منتر

…پڑھا کرتی ہے

یہاں کے رنگ انوکھے ہیں مگر

آسمان وہاں پہ کِرنیں سجاتا ہے

یہاں اُڑتی ہے ملِکہ بن کے تِتلی

تاج وہاں پہ غُلام پہناتا ہے

یہاں اِختیار کی حد میں ہے قید

حِصار وہاں پہ جادُو جگاتا ہے

یہاں چٹّان پہ بادل سجدہ گر ہے

ساون وہاں پہ دھُوپ چھُپاتا ہے

یہاں جلتی ہےشمعٰ اپنے آپ ہی

دِیا وہاں پہ محبوب سُلگاتا ہے

اُس جہاں سے پرے اِس حد کے کِناروں میں

سُرمئی شام سے آگے اوٹ کی لِہروں میں

اُفق کے پیراہن پہ کُہرے کی بانہوں میں

شمس کی پلکوں تلے چلمن کی چھاؤں میں

یاد کرتی ہوئی چند نِیم خلِش راہوں میں

آنکھ میں چھُپتی نظروں کی سِلوٹوں میں

عبادت میں گھِرتے بےسُدھ سجدوں میں

رُوح میں اُترتے کافر بُت کے قدموں میں

جواں عکس کےآئینےکی ٹُوٹتی اُمنگوں میں

اُس انجان صنم کی مدہوش دھڑکنوں میں

مُنتظر شمعٰ کے بے نقاب ہِجابوں میں

اور ڈھانپتے تَن کے بے پناہ اُجالوں میں

جِن حسرتوں میں جلا ہے دل

گر پھُول خُود راکھ ہو جاتا

…تو شمعٰ واپس لَوٹ جاتی

جہاں سے شروع ہےسفر درد کا

گر کارواں خُود بھٹک جاتا

…تو راہ گُزر واپس لَوٹ جاتی

جدھر نہ پُہنچے مِہک ہمنوا کی

گر گُلستان اُجڑ جاتا

…تو کلی واپس لوَٹ جاتی

جب کہِیں پا نہ سکے سرُور کوئی

گر قرار حاصل ہو جاتا

…تو بے چینی واپس لَوٹ جاتی

جس اِنتظار میں جِیۓ پَل صدیّوں کے

گر وہ لمحہ پھِنسل جاتا

…تو راحت واپس لوَٹ جاتی

نرم ہونٹوں کی شبنم

صندلی ہاتھوں کی خوُشبو

شوخ دل کی دھڑکن

…مُجھے یاد تو کرتے ہوں گے روزانہ

روشن آنکھوں کے ستارے

چُنتی راہوں کے پھُول

اُبھرتی رات کی چاندنی

…میری تمنّا تو کرتے ہوں گے روزانہ

آدھے خواب کے قِصّے

بے چین کروٹ کی کسک

نم آنکھوں میں خواہش

…میرا رستہ تو دیکھتے ہوں گے روزانہ

جلتے ہیں دِیۓ چراغاں میں جیسے اکثر

خُدا کرے ہتھیلی پہ مجھے بھی جلاۓ کوئی

آئینے میں جس طرح سما جاتا ہے چاند

خُدا کرے دیکھ کہ مجھے بھی شرماۓ کوئی

ٹکرا کے جب نظر پُہنچے مقام پر اپنے

خُدا کرے منزل پہ مجھے بھی مِل جاۓ کوئی

خواب لیتے ہیں انگڑائی جیسے کروٹوں میں

خُدا کرے حقیقت میں مجھے بھی جگاۓ کوئی

شمعٰ کے رنگ کرتے ہیں بے بس جس طرح

خُدا کرے آرزو میں مجھے بھی نِہلاۓ کوئی

کہِیں تُمہیں وہ نظر تو یاد

نہیں آتی جس کی مستی

چُوما کرتی تھی تُمہیں

وصل کی بہاروں میں؟

کہیِں تُمہاری دھڑکن کا

جی چُراتی تو نہیں وہ نبض

جس کو چھُوا تھا تم نے

وصل کی بہاروں میں؟

کہِیں اُن ہاتھوں کی حِدّت

بہکاتی تو نہیں تُمہاری تڑپ

تھاما تھا جس نے تمہیں

وصل کی بہاروں میں؟

کہِیں تمہیں اُس آغوش کی مِہک

بُلاتی تو نہیں جس کی خوُشبو

میں بھُلایا تھا تم نے خُود کو

وصل کی بہاروں میں؟