Shayeri

اوڑھ لِیا ہے تم کو اِک

چادر میں لِپٹے کفن کی

طرح اپنے تَن پہ کیونکہ اب

تم آس پاس دِکھائی تو دیتے نہیں

بس اِک یاد کی مانند دفن ہو میری

…مَیّت کے ساتھ

کُچھ سُہانے پَل کئی بِسری

مُسکراہٹیں رکھ لی ہیں میں نے

کُچھ رَنج کے آنسُو اور مُرجھاۓ

شِکوے تُمہارے نام کرتی ہُوں اِس

…اَذِیّت کے ساتھ

کبھی ٹکرا جاؤ غلطی سے تو

گُزر جانا کہ جیسے پہچانا نہیں

یا بے رُخی سے دیکھ لینا جیسے

کبھی جانا نہیں کیونکہ اب بس

اُس اُمید کو جلا دیا ہے اپنی

…شخصیّت کے ساتھ

نہ تھی بے وفا قسمت نہ ہی

وفادار چاہت نِکلی پھر وہ کیا

شے تھی جس کے رنگ میں بِکھر

گیا اُس کا اپنا رنگ اور بے رنگ

ہُوئی میری آشنائی اُس

…مِلاوٹ کے ساتھ

کچّے تھے مراسِم اور سیاہ

وصل کے دھُوپ چھاؤں کہ

ٹنگے رہے ضمیر کے ڈھیر تلے

نُورانی جسم اور اب تھک گیا

ہے بُت اِس سفر کی سُنسان سڑکوں

کی خاک چھانتے کہ اب رُوح کرتی

ہے رُخصت مُسافر کو سفر سے

…اِجازت کے ساتھ

ویسے تو جی رہی تھی

خوابوں کی نقلی دُنیا میں

پہلے سے ہی کہ اب پھر

لگتا ہے کہ اُسی مقام پہ

…لَوٹ آئی ہے زندگی میری

تھے چند لمحے جس سراب

کی کہانی لکھنے میں مشغُول

کہ لگتا ہے اب اُس کردار

کے انجام سے وابستہ ہے

…بقیہ زندگی میری

کُچھ لفظ تھے دُشمن میرے

کہِیں اَنا نے گھیر لیا اُس

دل کو، شکست کھائی میں نے

مگر اب لگتا ہے اِس عادَت میں

…گُزر جاۓ گی زندگی میری

عِشق کا ٹِھکانہ نہیں

تبھی اِس کی زمین ہے

عِشق کے پاؤں نہیں

تبھی اِس کی اُڑان ہے

عِشق کے اصُول نہیں

تبھی اِس کی پِہچان ہے

عِشق میں پستی نہیں

تبھی اِس میں اُٹھان ہے

عِشق میں قید نہیں

تبھی اِس کی شان ہے

عِشق میں کہانی نہیں

تبھی اِس میں داستان ہے

 

چوٹ کھا کر بھی یہ

..بے درد زخمی نہیں ہوتا

بِکھر جاتا ہے پاگل

..کِرچے کِرچے نہیں ہوتا

ذات کر دیتا ہے فنا

..ریزہ ریزہ نہیں ہوتا

عزّت داغدار ہو اگر

..ظالم رُسوا نہیں ہوتا

کرے گھائل دُنیا اگر تو

..پاش پاش نہیں ہوتا

سہے ہِجر کے تِیر مگر

..اِسے محسوس نہیں ہوتا

مِٹّی کے ڈھیر تلے دبی جاتی ہُوں

درد کی پَستی تلے دھنسی جاتی ہُوں

پراۓ غم ہوں یا زخمِ آشنائی

مایوس سمندر تلے ڈُوبی جاتی ہُوں

سہا جاۓ نہ وہ زہر جس کے اثر سے

موت کے پردے تلے اُتری جاتی ہُوں

خوف کے ساۓ نے جکڑا ہے کلیجے کو

نا قدری کے کفن تلے چھُپی جاتی ہُوں

بزمِ شمعٰ اب راکھ کا ڈھیر ہے فقَط

سسکتی موم تلے جمی جاتی ہُوں

قدر نہیں جہاں میں جس کو ہمدرد و پیارکی

تنہا ہی رِہ جاۓ گا اَنا کے لحاف میں لپٹ کر

کرے نا انصافی سمجھ کر اِنصاف ستم گر

گُناہ گارہی مَر جاۓ گا اَنا کے ریشم میں سِمٹ کر

بیدار کیوں کرتے ہو مُردوں کو اے زِیست پسندو

دَبتا ہی رِہ جاۓ گا اَنا کے کفن میں لپٹ کر

ہر دل عزیز ہے تکبّرِ عروج کا میرے رقیب کو

ہاتھ مَلتا ہی رِہ جاۓ گا اَنا کے رنگ میں سِمٹ کر

….آج آزاد ہے دل

اُن جھُوٹے دِلاسوں سے

جہاں پُہنچ کر کِیۓ تھے

..کبھی روشن زمانے میں نے

….آج آزاد ہے جاں

اُس قید سے جہاں لگا

تھا کبھی کہ بیڑیوں سے

..سنورتا ہے حُسن اور بھی

….آج آزاد ہے رُوح

مِٹّی تلے اُس ڈھیر سے

جس کی دِیواروں میں ڈھُونڈا

…تھا کبھی اپنا آشیانہ

….آج آزاد ہے شمعٰ

اُن آنسوؤں سے جن کو

پیِتے ہی فنا ہُوا کرتی تھی

…چاہت پروانے کی کبھی

عشق اِنتہاۓ سرکشی کااُجڑا مزار ہے

نہ ڈَر ہے نہ خوف اِس کی تقدیر کا حِصّہ

ہجر و فُرقت میں بھی دیتا ہے سرُور بہت

وفاۓ بندگی ہے اِس ادھوری تحریرکا قِصّہ

پتنگِ جاں میں اَٹکی ہُوئی سانسیں ہیں

لہُو کی بِساط پہ ہے پھینکا ہُوا ایک پتّا

نظر سے رُوح چھُوۓ تو گُناہِ کبیرہ کیوں

جبر کی غُلامی پہ جھُکتا ہُوا حُکم کا اِکّا

ناشاد کرے اِحساسِ بے رُخی کی ادا اُسے

سمجھ سکو تو احترام ورنہ تو کھوٹا سِکّہ

میں ایک صدی سے تنہا سوئی نہیں

خواب کی نیند کبھی کھوئی نہیں

یہ عجب بات ہے کہ میں روئی نہیں

اور رات ہم کروٹ کبھی ہوُئی نہیں

کیوں چاندنی ذُلف بھِگوئی نہیں

اِس راہ کہ ہمراہ میں ہوُئی نہیں

یہ سَچ ہے کوئی دِل جوئی نہیں

کیوں اُداسی جشن میں پِروئی نہیں

اِن وقت کے تقاضوں میں کہِیں

کھو گیا ہے پَل شاید

چُور ہے دل مجبوری سے

…جانے پھر مجبوری کیا ہے

طویل سفر کی مُسافتوں میں

بھٹک گۓ ہیں مُسافر شاید

منزل مِلے یہ ضروری تو نہیں

…جانے پھر ضروری کیا ہے

اِنتہا ہے درد اور انجان صنم

نظر انداز کرے بھی تو کیا گِلہ

مانے نہ ہَوا جب وہ اِشارے

…جانے پھر منظوُری کیا ہے

جلتی ہے یاد ہتھیلی پہ یُوں

تھک گئی ہے رقص کرتے کرتے

تھِرکیں تو ڈگمگائیں قدم

…جانے پھر کمزوری کیا ہے

قسم ہے اُس دل کی دھڑکن کی

جُدائی نے کر دیا ہے اور تنہا

رنج میں سرُور کا ہےعالم شامل

…جانے پھر زُودرنجی کیا ہے